Exodus 40
Yes Israela tipayooz balbaal patabuyaaŋ to Maaron
1Ra Yoova isaav pa Mose ighe: 2“Ndaman tau naghoon ne, kaiyo tau imuuŋ pani, ve saawe imin maata, mako upayooz balbaal patabuyaaŋ. Leso imin niag to lepoogh, ve itiŋa taluplup ghiit iloŋ ila pa savsaveeŋ. Ugham tauvene: 3Bokis to Saveeŋ Mbuaaŋ tau tutuuŋ tsiau igheen ila loolo na, ughuru imuuŋ iloŋ ila balbaal loolo ta muŋgaaŋ we. Tutuuŋ tana isavia eez to ataghoni leso lupuuŋ toit igheen tuŋia. Mako udaad uuli tiina ila balbaal loolo to ipoon bokis tawe. Balbaal loolo tiina tau igheen potla na ene patabuyaaŋ. Ve loolo marani tau bokis tana igheen pani na, ene patabuyaaŋ le patabuyaaŋ kat.4“Udaad uuli le isov, mako ughur boor to mberet patabuyaaŋ iloŋ ila balbaal loolo tiina tau igheen potla na, ve ughur mberet patabuyaaŋ izala.
“Le isov, mako upayooz lam aia iloŋ ila, ve ughur lam liim ve ru ila niazi.
5“Mako ugham artaal gol marani to tunuuŋ gabua tau vazizi popoia na, ve ughuru iloŋ ila balbaal loolo tiina izaŋar Bokis to Saveeŋ Mbuaaŋ. Uyauur saveeŋ mariŋ to balbaal loolo iloŋ ila le isov, mako udaad uuli tiina ite gha ipoon balbaal naagho.
6“Mako ughur artaal tiina to watooŋrau igheen soghan rig pa balbaal naagho, 7ve ughur oon tiina to ririwaaŋ igheen bodbodaaŋ pa balbaal naagho ve artaal tiina, ve uliŋ yaa ila loolo. 8Mako udaad uuli mamalaua ilivutin balbaal, ve udaad uuli ariaaŋa ila sirsiir aavo imin ataman pani.
9“Upasov uraat naol tana le isov, mako ugham ŋgoreeŋ, ve uliŋi izala balbaal tomania saveeŋ mariŋ tau tigheen iloŋ ila loolo na, leso ughur zi timin leg. Gabua isov tana, ena patabuyaaŋ. 10Le isov, mako uliŋ ŋgoreeŋ izala artaal tiina to watooŋrau, tomania saveeŋ mariŋ to uraat, ve oon to ririwaaŋ, tomania boor tau oon tana igheen izala paavo na paam. Leso ughur zi timin leg. Artaal tana, ene patabuyaaŋ le patabuyaaŋ kat.
12“Upasov uraat naol tana le isov, mako ugham Aron tomania natŋa zitamoot tilam tigharau ataman aavo to balbaal patabuyaaŋ, ve urughuuz zi. 13Urughuuz zi le isov, mako unonogh Aron pa nonoghiiŋa tooni patabuyaaŋ to uraat, ve uliŋ ŋgoreeŋ izala daaba to ughuru imin leg. Leso imin ŋeer to watooŋrau ve ibesbees payau. 14Mako ugham natŋa anazi tilam, ve unonogh zi pa nonoghiiŋa toozi to uraat paam. 15Ve uliŋ ŋgoreeŋ izala dabazi imin ugham pa tamazi. Leso timin zeran to watooŋrau ve tibees payau. Yesŋa paaghu toozi tau murei pale tivot na, aat tikis uraat tane, taghon taghon gha ila.”
16Yoova isavsaav le isov, ra Mose ipaburigin uraat. I igham uratoi gabua naol isov tawe itaghon saveeŋ tau Yoova isavia pani na. 17Tauvene saawe tau yes Israela tivool pa ndaman paaghu, saawe imin maata to kaiyo tau imuuŋ pa ndaman tana na, tipayooz balbaal patabuyaaŋ to Yoova. ▼
▼(40:17) Yes Israela tipul Isip, ve tilaagh tila le kaiyo imin tol pani, ra tivot loloz Sinai. Tileep ta sewe irau kaiyo liim ve paaŋ, ra tivool pa ndaman paaghu. Saawe duduuŋ tau ndaman paaghu tana iburig, yes tipayooz balbaal patabuyaaŋ.
18Tipayooz rir, mako tighur didiiŋaia izala pavozi. Ve tizeev sandiiŋ itaghon puura tau kiriiŋ pataghaaŋ ila didiiŋaia na, leso ikis didiiŋaia tiyooz tuŋia. Ve tipayooz rir mamalaua paaŋ ila pa balbaal naagho, ve tiraraav uuli tintiina siriv izala balbaal paavo, itaghon Yoova aliiŋa tau isavia ila to Mose na.
20Ra Mose igham maet ru tau tutuuŋ to Yoova igheen ila na, ve ighur zi ila Bokis to Saveeŋ Mbuaaŋ loolo. Maet ru tawe, ene to ipalot yes Israela, leso matazi kisin saveeŋ mbuaaŋ toozi tomania Yoova ve titaghoni. Ve Mose izeev siŋ ru itaghon niazi tau igheen Bokis To Saveeŋ Mbuaaŋ ziige leso tibaado. Ve ipagud bokis aavo. Bokis aavo tawe, ene tiwaato tighe ‘Nugh To Rewaaŋ Sosor.’ b
21Ra Mose ighur Bokis to Saveeŋ Mbuaaŋ iloŋ ila balbaal loolo, ve idaad uuli tiina ee, leso ipoona itaghon Yoova aliiŋa.
22Le isov, ra ighur boor to mberet patabuyaaŋ iloŋ ila balbaal loolo tiina tau igheen potla na. Igheen ila ziige ila pa kaagu. Ve ighur mberet patabuyaaŋ izala, leso igheen ila Yoova naagho, itaghon Yoova aliiŋa tau isavia pani na.
24Ra igham lam aia iloŋ ila balbaal loolo tiina, ve ipayooze ila ziige tau ila pa daudau, ve itoora le izaŋar boor to mberet patabuyaaŋ. 25Ve iraar lam liim ve ru izala, leso tisul ila Yoova naagho, itaghon Yoova aliiŋa tau isavia pani na.
26Ra ighur artaal gol marani to tunuuŋ gabua tau vaazi poia na ila igharau uuli tiina tau iŋgat balbaal loolo. 27Ve itun gabua tau vaazi popoia izala, itaghon Yoova aliiŋa tau isavia pani na.
28Mose igharaat balbaal tomania gabua naol isov tau tigheen iloŋ ila na le isov, ra idaad uuli tiina gha ipoon ataman aavo, ve igham uraat to muuri. 29Ighur artaal igharau sirsiir to balbaal patabuyaaŋ atamana, ve igham watooŋrau siriv itaghon Yoova aliiŋa tau isavia pani na. I indav ŋgai siriv izala artaal, ve indav aniiŋ wit siriv imin watooŋrau paam. 30Le isov, ra ighur oon tiina igheen bodbodaaŋ pa balbaal naagho ve artaal tiina, ve iliŋ yaa ila loolo. Leso saawe tau i tauu, ma Aron, ma Aron natŋa tiloŋ tila balbaal loolo, ma tigharau artaal, mako timin nimazi ve aghezi pa yaa tawe. 33Igham uraat tana le isov, ra idaad uuli mamalaua ilivutin balbaal tomania artaal tiina imin sirsiir, ve idaad uuli ariaaŋa ee imin ataman to sirsiir tawe.
Tauvene uraat naol isov tau Yoova isavia na, Mose igham uratoini le isov.
Yoova itotoi mbonari pa yes Israela
34Ra taitai tau Yoova ileep ila na, izilam le itav balbaal patabuyaaŋ, ve Yoova mbonari isul toman tapiri tiina irau balbaal loolo. Tauvene Mose irau iloŋ ila mako. c36Saawe tau yes Israela tilaghlaagh izi nugh ŋginaaŋa, matazi ilala pa taitai tawe. Isaav ighe ipul balbaal patabuyaaŋ paavo ve izuur ila, ene yes paam tiburig, tiyauyau, ve tilaagh titaghoni. Ve isaav ighe iyooz tuŋia izala balbaal paavo, ene irau tilaagh mako. Tileep ve tisasaŋan le tighita taitai izuur muul, mako tiburig tilaagh.
38Tauvene saawe tau yes Israela tilaghlaagh izi nugh ŋginaaŋa, matazi ilala pa taitai tawe ve titataghoni. Ighe mataaz, mako tisov tighita taitai tau Yoova ileep ila na, iyozyooz izala balbaal patabuyaaŋ paavo. Ve ighe mboŋ, mako tighita taitai tawe isul imin yav. d
Copyright information for
TUCT